1 Corinthians 15
1 兄弟姊妹啊，𠊎愛你等記得𠊎以前傳給你等个福音；這福音你等已經領受，也用它來做信心个基礎。
2 若係你等執守這福音，就係𠊎所傳給你等个道理，你等一定會得救；除非你等个信係盡盡採採个。
3 𠊎所領受个道理，𠊎已經傳給你等，最重要个就係：照聖經所講，基督已經為𠊎等个罪死了，
4 並被人埋葬了；又照聖經所講，第三日復活了。
5 佢識顯現俾彼得看，又顯現俾十二個使徒看。
6 以後，佢識一擺對五百零個跈佢个人顯現；這兜人大部份還在，雖然有兜已經過身了。
7 後來，佢顯現給雅各看，又對所有个使徒顯現。
8 最尾，佢也顯現給𠊎看；𠊎像係一個吂足月就出世个人。
9 在使徒中間，𠊎係最細个，堪毋得稱做使徒，因為𠊎識迫害上帝个教會。
10 總係，𠊎成做今晡日个𠊎，係照上帝个恩典。佢賜給𠊎个恩典無落空；反轉，𠊎比其他个使徒還較辛苦工作；其實，毋係𠊎，係上帝个恩典同𠊎共下工作。
11 結果共樣，無論係𠊎抑係別个使徒，𠊎等恁樣傳，你等也恁樣信。
12 既然𠊎等傳講基督已經對死復活，樣般你等中間有人講無死人復活這件事呢？
13 若係無死人復活這件事，基督就無復活了。
14 基督若無復活，𠊎等所傳个就係空个，你等所信个也係空个。
17 基督若無復活，你等个信仰就無價值，你等還迷失在罪个底背。
18 這意思就係，該兜過身个基督徒也攏總滅亡了。
19 𠊎等信基督个人若只有在今生有希望，𠊎等就比世間其他个人還較可憐了。
20 事實上，基督已經對死復活；這係愛保證過身掉个人也愛跈佢復活。
21 既然死係對一個人來，死人个復活也係對一個人來。
22 共樣，眾人个死係因為佢等同亞當結連，眾人个復活係因為佢等同基督結連。
23 總係，逐儕愛照順序來復活：頭一個係基督；然後，在佢再來个時，正係屬佢个人。
24 然後末期會到；該時基督愛消滅一切靈界个執政者、掌權者，㧯有能力个，將王權交還阿爸上帝。
25 因為基督的確愛掌權，直到上帝贏過一切仇敵，使佢等降服在佢个腳下。
26 最尾受毀滅个仇敵就係死。
27 因為聖經講：「上帝使萬物全部降服在佢个腳下。」盡明顯个，這位所講个「萬物」無包含上帝自家，因為使萬物降服在基督腳下个就係佢。
28 到萬物降服基督个時，孻仔本身也愛順服使萬物降服佢个上帝，好俾上帝完全統治一切。
29 若毋係恁樣，該兜代死人領受洗禮个有麼介意思呢？佢等所希望个係麼介呢？若係無死人復活這件事，佢等樣般還代死人領受洗禮做麼介？
30 𠊎等又樣般愛時時刻刻冒險呢？
31 兄弟姊妹啊，𠊎逐日都面對死！𠊎敢恁樣講，因為𠊎所誇口个係你等同𠊎共下在𠊎等主基督耶穌生命底背。
32 𠊎在以弗所同該兜喊做「野生个禽獸」拚命，若係照人个動機，對𠊎有麼介利益呢？若無死人復活這件事，𠊎等像俗語所講：「現食現好，會死韶早！」恁樣行就好了。
33 毋好被人騙去；愛記得：「壞朋友會敗壞好德行！」
34 好醒了，愛行正路，毋好再犯罪；因為你等中間有人無認識上帝。𠊎講這個話係愛俾你等知見笑。
35 有人會問：「死人愛樣般復活呢？佢等會有樣般个形體呢？」
36 你樣恁戇！你委在泥底背个種子，若無先死掉，就無法度生出來。
37 你所委个係麥仔，抑係別樣个種子，攏總係一粒一粒个，並毋係後來所生出來个形體。
38 總係，上帝照自家个意思給它形體；佢使各樣種子有各樣个形體。
39 各樣个動物也有無共樣个肉體：人有人體，禽獸有禽獸个形體，飛鳥有飛鳥个形體，魚有魚个形體。
40 還有天頂个形體，㧯地上个形體；總係天頂个形體有一種个榮光，地上个形體有另外一種个靚。
41 日頭有日頭个光，月光有月光个光，星仔有星仔个光；甚至這隻星仔㧯該隻星仔个光也無共樣。
42 死人个復活也係恁樣。埋葬个身體係會腐爛个；復活後个身體係毋會朽爛个。
43 埋落去个係盡無體面个，復活个係盡榮光个；埋落去个係軟弱个，復活个係強壯个；
44 埋落去个係血肉个身體，復活个係屬靈个身體。既然有血肉个身體，也就有屬靈个身體。
45 聖經恁樣講：「頭一個人亞當受造成做有生命个人」；總係，末後个亞當係賜生命个靈。
46 毋係先有屬靈个；係先有血肉个，然後正有屬靈个。
47 頭一個亞當係用地上个泥做个；第二個亞當係對天頂來个。
48 該用泥做个樣般，該兜屬泥个人也樣般；該對天頂來个樣般，該兜屬天个人也樣般。
49 𠊎等已經有屬泥个人个形像，將來也會有該對天頂來个人个形像。
50 兄弟姊妹啊，𠊎所愛講个係：血㧯肉个身體做毋得承受上帝个國，會腐爛个做毋得承受毋會朽爛个。
53 因為會腐爛个愛變做毋會朽爛个，會死个愛變做毋會死个。
54 到會腐爛个一變做毋會朽爛个，該會死个一變做毋會死个，聖經所講這句話就實現了：「死亡已經被勝利吞滅了！」
55 死啊！你个勝利在㖠位？死啊！你个毒竻在㖠位？
56 死个毒竻係對罪來个，罪个權勢係對法律來个。
57 總係，感謝上帝！佢使𠊎等通過𠊎等个主耶穌基督得到勝利了！
58 所以，親愛个兄弟姊妹啊，你等愛企在，毋好搖動。愛常常認真做主个工作；因為知，你等為主所做个工作一定毋會空空。